Patay ang usa ka suspetsadong kawatan kinsa gikatahong gihapak og bato sa ulo sa wala mailhing tawo kagahapon sa buntag diha sa Sitio Kasagingan, Barangay Lawaan III dakbayan sa Talisay.
Si Ariston “Aris” Cabuenas, hingkod ang panuigon, taga Sitio Mananga II sa nahisgutang siyudad patay na nga naugkat sa mga polis diha sa nahisgutang lugar.
Si Cabuenas nakaangkon og liki sa iyang ulo nga gituhoang gihapak kini og bato nga maoy hinungdan sa iyang kamatayon.
Si PO2 Joel Rosales ug PO2 Enad kinsa maoy nagpahigayon sa imbestigasyon sa hitabo nakakuha og usa ka bato nga nagkadugo diha sa lugar nga nahitaboan.
Base sa imbestigasyon sa nahisgutang mga polis nga si Cabuenas nalambigit og ilegal nga kalihukan sama sa pagpangawat, pagpanulis ug pagpanglabni diha sa siyudad.
Si Cabuenas adunay nag-ong-ong nga kasong kriminal diha sa sala ni Judge Mario Manayon sa Municipal Trial Court in Cities.
Ang patay'ng lawas ni Cabuenas gidala diha sa Saint Francis Funeral Homes sa Natalio Avenue niining dakbayan para sa autopsy.