2 patay sa pista sa Mandaue

Duha ang namatay ug tulo usab ang grabeng naangol sa nahitabo nga mga pagpamusil sa managkalahing takna ug dapit atol sa pagsaulog sa tinuig nga pangilin ni Sr. San Jose, patron sa Mandaue.

Giila ni PO2 Chester Quiros ang unang gipusil patay mao si Rey Tabanao, hingkod ang panuigon ug nagpuyo sa Tribunal, Centro ug Alejandro Saladaga, hingkod ang panuigon nga nagpuyo sa sitio Liong, Alang-Alang, Mandaue.

Dugang giila ni PO2 Quiros mao ang mga naangol nga sila si Grant Dennis Berhay, 21 ug Alex Sanchez, 38, ug Jeffrey Tamalorin, taga Opao, Mandaue.

Matud pa ni PO2 Quiros nga kuyog ni Tabanao sila si Berhay ug Sanchez dihang kalit lang gipamusil sa wala mailhing mamumuno ug kuyog usab ni Saladaga si Tamalorin dihang gipusil sa nailhan nga Ave sa Mantuyong sa maong dakbayan.

Dali nga gidala sa Mandaue City Hospital ang mga biktima apan ang duha nga sila si Tabanao ug Saladaga kinsa nakabaton og grabeng pagkasamad gideklarar sa mga doktor nga patay na nga nahidangat kanila.

Samtang ang tulo nga grabeng naangol padayon karon nga giatiman sa mga doktor sa Mandaue City Hospital apan gibalhin karon sa tambalanan sa dakbayan sa Sugbu.