Bisan og mipahibalo na ang moderator sa maong forum nga gidili ang pagsaba-saba ug singgit-singgit ngadto sa mga mitambong apan aduna gihapoy mga tigsuporta ang wala motuman niini.
Si Tajanlangit miawhag sa mga kandidato sa pagbadlong sa ilang mga tigsuporta dihang pwerte nang sabaa sa covered court aron malikayan ang kasamok.
Si Mayor Socrates Fernandez sa administrasyon ubos sa partido Kampi-Alayon mao lang ang mitambong sa forum.
Ang kaalyado ni Fernandez nga si Bise Mayor Abedovey Belleza ug ang tanang mga kandidato sa pagkakonsehal ubos sa nahisgutang partido wala motambong.
Sa grupo sa oposisyon si incumbent councilor Emil Go lang ang wala makatungha.
Ang mga konsehal gitugotan og tulo ka minuto nga makasulti sa ilang mga plataporma ibabaw sa entablado, pito ka minuto usab ang gihatag sa mga kandidato sa pagka- Bise Mayor ug napulo sa kandidato sa pagka-Mayor.
Sa independente, si Johnny delos Reyes kinsa midagan isip mayor sa Talisay ug ang grupo niini mitambong usab sa maong kalihukan ug si Ara Capala Go.
Human sa higayon nga gihatag aron makasulti ang mga kandidato sa ilang mga plataporma gisunod dayon ang open forum diin ang mga Talisaynon nga mitambong gitugotan nga makapangutana ngadto sa mga politiko aron mailhan nila ang mga kandidatong ilang pilion karong umaabot Mayo 14.
Si Fernandez gipangutana nga unsaon sa pagkahibalo sa mga Talisaynon sa mga plataporma sa iyang mga kaubang kandidato nga wala man kini motambong sa forum.
Matud ni Fernandez nga wala na kinahanglana nga motambong ang iyang mga kaalyado tungod kay ang iyang plataporma maoy gisuportahan niini.
Si Leyson wala usab makalikay sa pangutana kabahin sa SRP ug pagpahawa ni Mayor Tomas Osmeña sa mga tindera og isda diha sa Pasil ug Carbon ug sa mga sakop sa CITOM.
Ang mga tigsuporta ni Leyson ug Fernandez diriyot magkagubot tungod kay nagkainitay na kini.
Si Leyson gisinggitan og "boo" sa mga tigsuporta ni Fernandez ug mao usab ang kang Leyson ngadto ni Fernandez.
Tanang mga kandidato nga mitambong sa forum pulos nindot ang ilang tumong alang sa dakbayan diin ilang sentro mao ang pagpauswag sa edukasyon, panglawas ug paghatag og mga balay sa mga kabus ug ang uban pa kanila nangangkon na nga sila mga kabus.