Ang biktima giila nga si Diosdado Cadampog, 37, drayber sa traysikad ug nagpuyo sa dalan L-Flores, Pasil siyudad sa Sugbu.
Ang suspetsado giila nga si Lito Albarico, 32, usa ka utility man ug nagpuyo usab sa maong lugar.
Base sa imbestigasyon sa kapolisan, nakaplagan ni Albarico si Cadampog nga nagmaltrato ug mituok sa iyang kapuyo nga si Amelita Albarico, 34, walay trabaho.
Apan sa pagsulay nga uwangon ang pagpangulata, nasuko hinuon si Cadampog mikuha kini og sundang dayon gitigbas ngadto ni Albarico.
Nakaangkon si Albarico og duha ka samad sa ulo diin dali dayon kining gitabang human mauwang sa katawhan ang maong insidente.
Apan sa dihang isakay na unta si Albarico sa traysikad, kalit kining gigukod og sundang ni Cadampog. Nagdinaganay ang duha hangtod naabot sila sa mangitngit nga dapit diin ilang gitiwas ang ilang panagtigbasay.
Base sa imbestigasyon sa kapolisan, nailog sa suspetsado ang dalang sundang sa biktima diin nibawos dayon kini.
Napalgan na lang ang si Cadampog nakaangkon og daghang samad, samtang si Albarico dali dayong gidala sa ospital gikan sa naangkon niining samad sa ulo.
Giaresto dihadiha dayon si Albarico sa miresponde nga kapolisan human kini matambalan.