Si PO3 Joseph Damasco nga gikahinabi sa Banat News miila sa namatay nga si Jessie Alcantara, 36 anyos, minyo nga nagpuyo sa maong dapit.
Giila usab ni PO3 Damasco ang grabeng naangol nga kauban ni Alcantara nga si Carmelo Tero, 43 anyos, minyo nga taga sitio Cadulang, Marigondon sa maong dakbayan.
Ang duha pulos nakabaton og daghang samad sa kalawasan apan si Alcantara lamang ang naggrabehan nga maoy nakaingon sa iyang hinanaling kamatayon.
Matud pa ni PO3 Damasco nga gikaaway sa mga biktima ang upat ka tawo nga kustomer sa videokehan nga gipanag-iya ni Marissa Godinez nga ang usa kanila nailhan lang sa ngalan nga "Jessie".
Si PO3 Damasco miingon nga nag-ilog sa microphone ang mga biktima ug ang upat ka laing kustomer nga maoy nakaingon sa panaglalis ug misangko sa pagpanunggab.
Dugang pa niya nga nahidangat ang kapolisan sa Presinto 3 nga maoy nakatubag sa maong alarma apan ang mga suspetsado dali usab nga nakasibat pahilayo sa maong dapit.
Dali nga gidala ang mga biktima sa Opon District Hospital sa Carajay, Gun-ob sa maong dakbayan apan si Alcantara ang gideklarar sa mga doktor nga patay na nga nahidangat kanila.