Si City Accountant, Buenaventura Igot nagkanayon nga mga alas 10:35 kagahapon sa buntag, nakadawat og tawag sa telepono ang usa sa iyang mga staff nga nagpahibalong adunay bomba sulod sa buhatan sa Accounting Office hinungdan sa ilang pagtawag sa mga sakop sa kapolisan.
Si Chief Insp. Jonathan Pineda, deputy chief sa LapuLapu nangulo sa miresponde sa maong alarma inubanan sa mga sakop sa SWAT sa dakbayan.
Gihimo dayon sa SWAT ang pagsuhid sa palibot sa Accounting Office gamit ang mga K9 dogs, dungan ang pagpagawas sa mga kawani sa city hall. Human sa pipila ka gutlo nga pagsuhid, nasuta nga negatibo sa bomba ang city hall hinungdan nga gipabalik sa kapolisan ang mga kawani ngadto sa tagsatagsa nila ka buhatan.
Gidudahan ni Pineda nga usa lamang ka pagpanghulga ang tawag, apan bisan pa niini kinahanglan nga mag-igmat ang mga guwardiya sa maong edipisyo aron dili malutsan sa mga dautang elemento nga buot mohimo og kadaot sa City Hall.
Mapasalamaton usab si acting Mayor Norma Patalinghug nga walay dautang nahitabo sa city hall. Giawhag niya ang mga kawani sa city hall nga mo-report dayon sa mga polis kun adunay mga gikatahapang tawo nga ilang mamatikdang maghimo og dautan.