Nahitabo ang pagpamusil sa lungsod sa Tomenjao, Daan Bantayan, Cantipay, Carmen, ug ang katapusan atubangan sa simbahan sa barangay Poblacion, Sibonga, Sugbu.
Ang unang biktima sa pagpamusil giila nga si Arnel Decipolo Moralde, risedente sa Sitio Balidbid, Tomenjao Daanbantayan Cebu.
Gitumbok ang usa ka Randy Pepito nga maoy nipusil sa biktima, lumulupyo sa Sitio Suba Ibabao, Talisay sa maong lungsod.
Ang biktima naabtan ni SPO2 Nero Manzanares ug mga kauban nga nagbuy-od daplin sa dalan nga wala nay kinabuhi ug may samad pinusilan sa ubos sa tiyan mga alas 4:00 sa miaging kadlawon.
Hangtud ning pagsulat wala pa masayod ang kapolisan sa hinungdan sa krimen.
Human sa maong hitabo ang suspek misuway pag-ikyas sa ilang pinuy-anan apan walay swerte kay naabtan sa mga polis nga nihimo og hot pursuit operation diha sa barangay Maya samtang nagpaabot kini og bus nga kasakyan paingon sa dakbayan sa Sugbu.
Matud ni PO3 Dennis Velez nga nahinabi sa Banat News nga ila pang gisusi ang tinud-anay nga motibo sa krimen.
Ang ikaduhang biktima sa pagpamusil mao si Ariel Jopia, ulitawo, residente sa Cantumog Carmen kinsa patay nang naabot sa Vicente Sotto Memorial Medical Center gumikan sa tulo ka samad nga naangkon niini sa nagkadaiyang parte sa kalawasan.
Gitumbok sa kapolisan nga nipusil sa biktima mao si Lando Bermijo, hingkod ang panuigon ug residente sa Cantipay sa sama nga lungsod.
Sa pasiuna nga imbestigasyon ni Police Inspector Carlos Reyes, hepe sa kapolisan sa lungsod nasayran nga ang biktima natulog sa lantay sa usa ka panimalay dihang gipusil sa wala mailhing tawo.
Matud ni SPO1 Joselito Jopia nga nahinabi sa Banat News sa wala pa kini pusila ang biktima gipukaw pa kini sa pag-umangkon apan wala mopatuo.
Gituohan sa kapolisan nga ang karaang panagbangi sa biktima ug suspetsado ang hinungdan sa pagpamusil.
Si Bernijo daling miikyas human sa insidente ug padayon pa kining gipangita sa mga polis.
Ang katapusang biktima nailhan nga si Mark Paul Lanit, 20, ulitawo, residente sa Lamakan sa maong lungsod.
Si Lanit gipusil tumong sa luyong bahin sa ulo sa nag-inusarang suspek nga nagtabon sa nawong gamit ang wala matinong kalibre sa armas.
Matud ni SPO3 Ramon Padilla pasado alas 11 sa miaging gabii ang biktima uban sa laing usa ka kauban naglingkod atubangan sa simbahan dihang kalit mitunga sa luyo ang suspetsado dayong dul-it sa dala niining pusil tumong sa ulo sa biktima.
Human sa hitabo yano rang naglakaw ang suspetsado palayo sa lugar.
Si SPO3 Padilla nagkanayon nga ilang gituohan nga fraternity related ang maong kremin apan wala pa siya motug-an kung unsa nga fraternity ang giapilan sa biktima.