Si Franklyn Moreno, 58, naabtan na lang nilang SPO1 Nonilon Estonilo ug PO1 Peter Gunzo Jr. nga nagbuy-od na sa sementadong karsada nga may samad sa tuong kutokuto ug ulo.
Ang kapolisan mitumbok sa usa ka Rufino Rematado, usa ka manananggot, nga maoy nagdunggab unya gidarok sa semento ang ulo ni Moreno hinungdan sa hinanali niining kamatayon.
Si Dr. Shiela Faciola nga miuban nilang SPO1 Estonilo ug PO1 Gunzo sa pagresponde, mihiling ni Moreno ug mideklarar niini nga patay nang daan sa pag-abot nila sa lugar nga nahitaboan.
Si PO2 Rolando Navarro nga nahinabi sa Banat News miingon nga mga alas 5 sa hapon, nag-inom silang Moreno ug Rematado uban sa mga higala sa usa ka tindahan samtang nanan-aw og volleyball.
Milakaw si Rematado aron mamalit og tuba apan nakabalik usa ka oras pa ang nakalabay. Apan si Moreno milakaw ug gidala ang usa ka galon nga tuba hinungdan nga giapas kini ni Rematado.
Nasuko hinuon si Rematado hinungdan nga iyang gidunggab si Moreno. Nakiglayog si Moreno apan nalupig sa kusog ug nadunggaban gyud kini ni Rematado sa kutokuto.
Nagtuo ang kapolisan nga ang pagkapantok sa sementadong karsada ang namatyan ni Moreno tungod kay mabaw lang ang samad nga naangkon niini. Si Rematado nakasibat gyud.