Ang napaig giila nga mao si Cloudie May Ann Lorvico, 5, ingon man ang manghod niining 11 pa ka bulan nga si Jazel Lorvico ug Chara Mae Auman, 13, ug residente sa naasoy'ng lugar nga gidala sa Oslob District Hospital human makaangkon og 3rd degree burns sa ilang kalawasan.
Si SFO2 Jaime Sacayno nga nahinabi sa Banat News miingon nga nagsugod ang sunog sa ikaduhang andana sa pinuy-anan ni Edilberto Auman nga mitapon sa kasikbit nga panimalay nga gipanag-iya ni Clementina Rosaga kinsa dunay upat ka mga anak.
Ang panimalay ni Auman ginama sa light materials ug semi concrete ingon man ang kang Rosaga.
Sa inisyal nga imbestigasyon sa kabomberohan nasuta nga nahabilin ang mga bata sa panimalay ni Auman ug nagsuga lang kini'g kandila nga kalit lang natumba sa salog nga kahoy nga daling gidakop sa kalayo nga maoy gitumbok nga hinungdan sa sunog.
Ang mga ginikanan sa napaig ug ang onse ka buwan giila sa magtiayong Auman nga si Gilbert ug Hazel.
Gikataho ang maong magtiayon nanglakaw ug ang ilang mga anak gibilin sa panimalay ni Auman ug gitugyanan sa pagbantay si Chara Mae Auman.
Laing 3-anyos nga igsuon sa 5-anyos ang nakalingkawas sa maong sunog kay giingon diha matulog sa silong ug daling nakadagan paingon sa gawas dihang nakamatikod nga nagsugod na pag-ulbo ang kalayo.
Si SFO2 Sacayno mibana-bana sa kinatibuk-ang danyos nga P110,000 sa duha ka panimalay nga naugdaw.