Si Garcia kinsa maoy kasamtangang tsirman sa Regional Peace and Order Council nagkanayon nga dili siya gusto nga magkaguliyang ang mga suporter nila ni Mayor Thadeo Ouano sa Mandaue ug Arturo Radaza sa Lapu-Lapu City.
Hinuon miingon si Garcia nga dili mabasol ang Ombudsman sa ilang gipakanaog nga hukom ilabi na kun may gikuptan silang mga ebidensiya batok sa apiktadong mga opisyal, apan nasabtan sa gobernador nga wa gyud kahatagi og "due process" si Ouano ug Radaza.
Giangkon sa gobernador nga nakurat kaayo siya ning maong kaugmaran kay wa siya magdahom nga ang kahalangdon ug kadalaygon sa kalamposan sa Asean Summit dinhi sa Sugbu namansahan ning maong matang sa kontrobersiya.
Apan nagtuo si Garcia nga ang maong suspension mapugngan pa kini kun may tukmang lakang ang duha ka mayor aron makombinse ang korte pagpalibkas sa maong suspension.
Samtang ingon niini ang panglantaw sa gobernador si Mayor Radaza sa iyang bahin midawat na sa maong mando sa korte ug mipadayag sa iyang lakang nga mohangyo sa hukmanan pagpugong sa suspension order.
Lahi kang Mayor Ouano nga nagmagahi pagdawat sa maong desisyon sa korte sa katarungan nga wa siya'y kasalanan sa kontrobersya sa lampposts.
Maoy hinungdan nga ang iyang mga abogado mihimo dayog lakang pag-apelar ngadto sa Court of Appeals paghangyo nga pugngan sa pagpatuman ang suspension order kang Ouano.
Usa sa mga abogado ni Ouano nga si kanhi Gobernador Pablo Garcia mipadayag sa iyang paglaum nga kaluwatan og temporary restraining order (TRO) sa CA is Ouano.