Salimbangon ipa-disqualify ni Clavel

Tinguhaon gyud sa banay'ng Martinez sa ikaupat nga distrito sa lalawigan sa Sugbu nga ma-disqualify si kanhi Bokal Benhur Salimbangon sa iyang kandidatura sa pagka-kongresista.

Gipahibawo ni Kong. Clavel Asas-Martinez ang ilang plano sa pagpasaka og petisyon sa buhatan sa Commission on Elections.

Matud pa ni Martinez nga dili gyud rehistrado si Salimbangon isip botante sa umaabot eleksiyon karong Mayo 14 ilabi na nga wala siya nagpuyo sa lugar nga giingong didto siya narehistro sa barangay Agujo, lungsod sa Daanbantayan.

Giklaro ni Martinez si Salimbangon lumad nga taga barangay Curva, Medellin apan wala na gyud kini nibotar sa eleksiyon human iyang gipilde sa pagka-kongresista niadtong 1998.

Sumala pa ni Martinez nga dili maangkon ni Salimbangon nga iyang residensiya ang ilang beach resort sa lungsod sa Daanbantayan ilabi na nga ubos kini karon sa renovation.

Gawas pa, wala mag-inusara ang banay'ng Salimbangon sa pagpanag-iya sa maong beach resort sanglit may lain kining tag-iya nga ilang higalang Intsik sumala pa ni Martinez.

Si Martinez dili na makapasubli hinungdan sa pagdagan sa iyang anak nga si Bogo Mayor Celestino "Tining" Martinez III ug maoy ikaatbang ni Salimbangon.