Sa samang higayon si Regional Director Susana Madarieta sa DOH-7 midili usab sa mga molupyo sa pagkaligo sa dagat tungod kay mahimong makadaot sa panit ang kemikal sa asayte sa maong dapit.
Ang nahisgotang asayte nayabo sa dagat gikan sa usa ka barko nga gibaradero sa Tsuneishi Heavy Industries-Cebu Incorporated diha sa barangay Buanoy, Balamban dihang nasunog kini niadtong miaging Biyernes sa gabii.
Ang asayte mibanaw sa kadagatan sa Balamban ug Toledo City nga matud pa nakapaislag sa mga isda sa kadagatan ug nakapaapektar sa panginabuhi sa mga mananagat.
Apan gumikan sa mga nakadangat nga taho ngadto sa DOH nga matud pa daghan lang gihapong nangaligo sa kadagatan luyo sa mga mibanaw nga krudo niini, nakaluwat si Madarieta sa maong pasidaan.
Matud pa ni Madarieta nga ang asayte may kemikal nga makahilo sa tawo diin bisan wa mamatay ang isda gumikan sa asayte apan kun nakahigop kini sa dagat nga may asayte ug makaon sa tawo ang maong isda, maghatag kinig peligro sa kinabuhi sa makakaon.
Mao gihapon kadtong panit sa maligo sa dagat nga may asayte, delikado gihapon.
Hinuon si Capitol Consultant Pablo John Garcia ug si Mayor Alex Binghay sa Balamban miluwat na og opisyal nga pamahayag nga matud pa kontrolado na karon ang maong oil spill.