Nahisakop sa grupo sa oposisyon ang pipila ka kaalyado sa mga Gerona nga moatbang sa umaabot eleksiyon karong Mayo 14 ug maoy paluyuhan sa Kabalikat ng Malayang Pilipino-One Cebu party nga gipanguluhan ni Gob. Gwendolyn Garcia.
Si konsehal Zito "Titing" Gallo ang nangulo karon sa oposisyon ug maoy kandidato sa pagka-mayor samtang iyang bise-mayor si konsehal Flordeliz "Bebe" Velayo.
Ilang ikaatbang si kanhi Mayor Casiano Gerona ug anak niining si kanhi Mayor Rex Casiano Gerona sanglit dili man modagan ang kasamtangang mayor nga si Raul Gerona, igsoon ni Rex.
Laing konsehal nga si Malyn Paradero nga dili na usab makapasubli ang anaa sa grupo ni Gallo ug Velayo isip ilang campaign manager.
Ang kandidato sa pagka-konsehal nga si Juan "Johnny" Menchavez napilde og 1,000 ka botos ni Rex sa pagka-mayor niadtong 2001 samtang si Poch Lamug napilde og 2,000 botos ni Raul niadtong 2004 sa pagka-mayor.
Si Menchavez nahimo na nga mayor ug bise-mayor sa Tabuelan kaatbang sa mga Gerona sulod na sa 20 ka tuig.
Sila si Menchavez ug Lamug masaligon karon sa ilang kadaugan gumikan sa panaghugpong na sa mga oposisyon.
Ubang kandidato sa pagka-konsehal mao sila si Jesus "Jesse" Ruelo, Florito Luyao, Diomedes "Joe" Lumbab, Juan "Jan" Banquicio, Richard "Reboy" Sido ug Salvador Pasaylo.