Mao na kini ang ika-limang aksidente nga gikalambigitan sa multi-milyones nga pinalit nga mga Innova units sa dakbayan sa Sugbu nga gihimong mga patrol car sa kapolisan.
Ang nabanggaan mao ang Innova Patrolcar nga may plakang SHN-889 nga gimaneho ni PO1 Carlo Balosoto, 23, sakop sa MPG, wala hinuon mapagan sa maong bangga ang maong polis.
Gitumbok nga nakadasmag kaniya mao ang usa ka taxi nga may plakang GXB-573 nga gimaneho ni Mario Carsbantes,38, taga Ylaya, Dumanjug.
Sa imbestigasyon ni PO2 Anthony Deligero sa Traffic Group ang patrolcar padulong moresponde sa usa ka trouble alarm nga nagtingog ang sirena ug nagsiga ang blinkers niini subay sa dalan Apitong samtang ang taxi nagsubay sa Escario padulong sa Archbishop Reyes Ave. niadtong tungura.
Apan sa pag-abot diha sa may eskina sa maong mga dalan napunggit ang tuong pultahan sa Innova hinungdan sa pagkaguba niini.Samtang naguba usab ang pangunahang bahin sa maong taxi.
Niadtong Biyernes sa hapon nabangga ang usa ka Innova Patrol car sa usa ka patrol car usab sa CITOM diha sa SRP, dili palang dugay usab nabanggaan og usa ka prime mover ang lain pang Innova patrol car diha sa SRP diin duha ka polis ang nangaangol.
Niadtong Pebrero 7 ning tuiga, misampak ang Innova patrolcar nga gimaneho ni Inspector Rex Campus diha sa poste sa Osmeña Blvd. human duha ka batan-on nga walay mga lisensya ang nagmaneho og motorsiklo ug naigo sa patrolcar nga miresponde.
Niadtong Disyembre, nadasmag usab ang susamang patrolcar sa usa ka taxi diha sa exit sa usa ka motel sa Gen. Maxilom Ave.
Tungod sa maong mga aksidente si Mayor Tomas Osmeña mimando na nga sibilyan nalang ang pamanehuon sa maong mga patrolcar aron maka-concentrate ang kapolisan sa ilang pagresponde.