Kahinumduman nga sa gipahigayong News Forum sa milabay'ng adlaw si Leyson kinsa modagan isip mayor sa siyudad karong eleksiyon sa Mayo nagkanayon nga ang Talisay parehas og kahimtang sa dakbayan sa Sugbu sa tuig 1988.
Si Leyson mitandi sa duha ka siyudad diin ang dakbayan sa Sugbu karon layo na og naabtan sa pag-uswag niini sa ekonomiya apan ang Talisay wala pa kini makairog.
Matud ni Leyson nga kung mahimo siyang mayor sa Talisay iyang paninguhaon nga ang siyudad mouswag usab sama sa Sugbu.
Apan si Abatayo nagkanayon nga sayop ang pagkompara ni Leyson sa Talisay ngadto sa Sugbu.
Matud ni Abatayo nga bata pa ang dakbayan sa Talisay tungod kay unom ka tuig pa lang kining nahimong dakbayan kompara sa Sugbu nga nahimo kining dakbayan sulod na sa 70 ka tuig ug dugay na kining nakapahimulos sa mga benepisyo isip usa ka siyudad.
Gibutyag sa konsehal nga ang usa ka siyudad makabinipisyo og P180 milyones nga Internal Revenue Allotment walay labot sa uban pang mga benepisyo.
Apan bisan sa kabata pa sa Talisay nagpakita kini og potential diin nakadawat kini og mga pasidungog usa na niini ang pagkapili sa Talisay nga numero uno sa tax collection sa milabay'ng tuig sa mga regional nga competition.
Sobra sa 50 porsyento ang pag-uswag sa nakolektang buhis sa Talisay nga nagpasabot wala mag-urong ang dakbayan.
Kahinumduman usab nga si Leyson misaway sa namunoan kaniadto ug karon sa Talisay nga wala makasulbad sa drainage system sa siyudad diin maoy usa sa problema sa mga Talisaynon.
Apan si Abatayo mikwestiyon ni Leyson nga isip konsehal sa dakbayan sa Sugbu nasulbad ba niini ang problema sa baha sa maong siyudad.
Si Abatayo midungag nga adunay ubang mga lugar sa Sugbu nga naproblema sa baha apan wala gani nabuhat nga solusyon niini si Leyson.