Atol sa press conference kagahapon sa udto gipasabot ni Osmeña nga iyang gituyo nga langaylangayon ang renewal sa business permit niini hangtod nga isibog sa igsuon niining kompaniya ang Ayala Stateland Consortium ang gihulagway sa mayor nga kwestyonabli niining transaksiyon pagsuplay og tubig sa Metro Cebu Water District (MCWD) nga adto kuhaon sa Luyang River sa Carmen nga sobra ra kaayo kamahal.
Si Osmeña maoy nangugat pagsupak sa maong transaksiyon sa Ayala Stateland ug MCWD nga pending karon sa National Economic Development Authority (NEDA) board tungod sa gihulagway niya nga mahal ra ang P25 kada metro kubiko nga presyo sa tubig ug labaw sa tanan ang P200 milyones nga gipangayong refund sa Ayala ngadto sa modaug nga challenger niining supplier.
Gibutyag ni Osmeña nga hangtod dili kanselahon sa Ayala ang maong transaksyon padayon usab niyang lisudlisuron ang Ayala Holdings pagkuha og bag-ong business permit dinhi sa dakbayan alang karong tuiga.
Nasayran nga napupos na ang deadline sa renewal sa business permit alang karong tuiga niadtong petsa 20 sa milabay'ng bulan sa Enero ug kadtong mga negosyante nga mo-renew sa ilang business permit gikan sa Enero 21 hangtod karon ang makabayad na kini og 2 porsiyento ug surcharge ug 25 porsiyento nga penalty.
Giklaro hinuon ni Osmeña nga mahigalaon siya sa mga magpapatigayon dinhi sa dakbayan gawas lang niadtong mga negosyante nga mopahimulos og mo-abusar sa gipakitang kaayo nilang mga opisyal sa dakbayan.