Matud pang Comendador, gawas sa gipahigayong "low-level" nga imbestigasyon ni Supt. Armando Radoc buot sa opisyal nga imbestigahon ni Inspector Mario Monilar ang insidente kung duna bay tulubagong kriminal si Glodove.
Gawas pa niini posible usab nga kasuhan si Glodove og administratiba diha sa buhatan sa Internal Affairs Service kung duna ba kini kapabayaan sa nahitabo.
Niadtong milabay'ng gabii, si Glodove kinsa padulong unta mosakay sa patrolcar diha atubangan sa Mabolo police station dihang kalit lang nga natagak ang 9 millimeter kaliber nga service firearm niini diha sa aspaltadong kalsada ug mibuto.
Naigo ang tulo ka mga naglakaw nga sila si Francis Mabatid,27 ug Avril Mabatid,6 anyos ingon man si Kevin Joseph Villaroba diha sa ilang mga tiil agi sa pinisik sa pag-igo sa bala diha sa semento.
Ang tulo daling gidala sa Cebu City Medical Center ug luwas na sa makuyaw nga kahimtang.
Si Monilar sa iyang bahin nagkanayon nga mag-agad sila sa testimonya sa mga biktima ug sa mga testigo kung unsay kasong masang-at batok kang Glodove.
Susihon usab ang gigrabehon sa kadaut nga nahiaguman sa mga biktima aron basehan sa pagpasaka og kaso, matud pang Monilar posibleng mapasakaan og kasong reckless imprudence resulting to physical injuries si Glodove.