Ang midangop sa Homicide Section kagahapon sa buntag mao si Teresita de Gracia, nagpuyo sa Fegueroa, Sawang Calero ning dakbayan.
Giila ni de Gracia ang iyang apo nga na-missing mao si Fatima Conception, 3rd year student sa Don Carlos Gothong National High School ug miyembro sa Kilusan Para sa Pambansang Demokrasya.
Matud ni de Gracia nga nahinabi sa Banat News kagahapon miingon nga sukad niadtong Disyembre 28 sa miaging tuig nilakaw ang iyang apo.
Nianang adlawa sayo sa buntag nananghid nga molakaw ug nagtuo siyang mokuyog nga mag-rally ang KDP kay niadtong higayona nagsingabot ang Asean summit.
Gikumpirmar usab ni de Gracia nga miyembro ang iyang apo sa Akrho Fraternity.
Nagtuo siyang mikuyog sa mga barkada kay kanunay kining molakaw ug gani sa sunod adlaw na mahiuli sa iyang panimalay.
Apan hangtod kagahapon nakahukom siyang modangop sa Homicide Section aron magpatabang sa kapolisan sa pamasin nga makit-an ang iyang apo.