Ang kagamhanan sa dakbayan nakadawat og mga taho nga ubang mga drayber sa traysikol maoy responsable sa pagpanangtang sa mga traffic signs.
Si Police Superintendent Romeo Perigo hepe sa kapolisan sa siyudad misugyot ngadto sa Talisay Traffic Commission nga mohatag og reward ngadto sa mga tawo nga motudlo ug motistigos batok sa mga responsable sa pagpanangtang sa mga traffic sign.
Si Bise Mayor Aberdovey Belleza tsirman sa traffic commission miuyon sa sugyot ni Perigo para masulbad ang nahisgutang problema hinungdan nga ang commission migama og resolusyon kabahin niini.
Ang maong resolusyon nagkanayon nga katunga sa P5 mil ihatag ngadto sa motudlo sa responsable sa pagtangtang sa traffic sign ug ang laing katunga ihatag kung motistigos kini batok sa responsable.
Sa milabay'ng duha ka semana ang siyudad namutang og mga traffic signs diha sa nagkalain-laing lugar sa Barangay Tabunok apan gikataho nga ang maong mga traffic signs gipangguba ug gipangtangtang sa ubang drayber sa traysikol.