Ang CIIB pinanguluhan ni Supt. Pablo Labra armado sa search warrant nga giluwatan ni RTC Branch 9 judge Geraldine Faith Econg batok sa tulo tungod sa paghupot sa iligal nga drogas.
Unang gironda sa kapolisan mao ang panimalay ni Dalina Villanueva Nabua, apan wala diha ang suspek. Nakuha sa kapolisan ang upat ka wala nay sulod nga medium packs ug kwartang P1,900 ug 20 dolyares nga gituohang halin sa gidiling drogas.
Pila ka minutos ang milabay gisunod usab sa kapolisan ang balay ni Marcris Blanca Villanueva, apan sa gihapon, wala diha ang subject sa search warrant.
Nakakuha gihapon ang kapolisan og usa ka dakong paketeng may sulod nga gidudahang shabu, duha ka medium size packs nga may sulod gihapong gidudahang shabu ug usa ka gamay'ng paketeng duna gihapoy sulod nga gidudahang shabu.
Laing balay nga gironda mao ang balay ni Marilyn Entoma alyas Mayang nga residente gihapon sa maong dapit. Apan wala gihapon kini sa maong balay.
Bisan pa man, ang CIIB uban sa mga tanod ug representante sa panimalay gisiksik ang palibot niini ug nakuha ang usa ka dakong pakete ug pito ka gagmay'ng paketeng pulos dunay sulod nga gidudahang shabu.
Ang ronda gisaksihan sa mga tanod ug kauban sa panimalay sa mga suspek uban sa sakop sa media.
Ang tulo gikatakdang pasakaan og kasong paglapas sa Akta Republika 9165 ugmang adlawa.