Kini tungod kay ang DPWH nakadawat na sa kopya sa resolusyon gikan sa Regional Development Council nga nag-awhag nga ang budget pagpatukod unta og flyover diha sa Mabolo, adto gastuhon sa pagmugna og flyover sa Banilad.
Ang RDC miingon nga samtang gikinahanglan ang flyover diha sa Juan Luna Avenue sa Mabolo, apan mas dinalian ang panginahanglan sa pagbutang og flyover sa Banilad.
Nabantayan usab sa kadagkoan sa DPWH nga wala kaayo makasinati og heavy traffic diha sa eskina sa Juan Luna Avenue ug Cardinal Rosales, kun itandi didto sa Banilad.
Nalangan ang pagmugna og flyover diha sa Mabolo tungod kay ang mga lumolupyo diha sa maong dapit, apil na ang mga madre, dakong supak kay nalantaw nila nga mohagip-ot og maayo ang Juan Luna Avenue kun butangan na og flyover.
Si DPWH assistant regional director Gloria Dindin nagkanayon nga mas migrabe ang problema sa trapiko diha sa Banilad tungod kay nagkadaghan ang mga tunghaan nga gitukod sa maong area, apil na sa Talamban.