Ang gasoline station nga nabiktima sa pagpanulis mao ang Petron Gas Station nga gipanag-iya sa pamilyang Golani sa Bogo.
Mokabat sa 6,700 ang nadala sa duha ka wala mailhing tulisan kinsa luwan sa kolor gray nga motorsiklo.
Sumala sa report sa kapolisan ang backrider nga tulisan miduol ni Loreta Sangines Lasit, 25, kahera sa maong gasolinahan ug nagpasinsiyo sa iyang P50 nga kuwarta.
Giablihan ni Lasit ang hunos sa lamesa nga gisudlan sa halin apan kalit kining gikuha ang kuwarta sa maong tulisan.
Diha-diha midagan si Lasit paingon sa sulod tungod sa kahadlok nga gipakitaan kini ug puluan sa armas.
Si Insp. Arturo Pacifico, hepe sa Bogo, Police Station nga nahinabi sa Banat News kagahapon dili makatuo sa pamahayag ni Lasit.
Matud ni Pacifico posibleng giilad dili ba kaha giatik sa tulisan nga gipakitaan og puluan sa armas hinungdan nga nahadlok kini ug nakahigayon hinuon sa pagkuha sa kuwarta human midagan ang kahera.
Duha ka gasoline boy atol sa maong pagpanulis apan ang usa niini gilingaw og istorya sa drayber sa motorsiklo samtang ang usa nagtubil og gasolina.
Si Lasti diha mopahibalo sa iyang duha ka kauban nga gitulis sila sa duha ka lalaki apan hingpit na kining nakabiya palayo sa lugar.
Matud ni Pacifico nakadawat siya'g text message sa text hotline tulo ka minutos human sa tulis.
Dali siyang mihimo og checkpoint sa Barangay Dakit apan milanat og dul-an sa oras wala gyud maagi ang gihatag nga description sa duha ka tulisan luwan sa motorsiklo.
Sa pagkakaron padayon pang imbestigasyon sa kapolisan ug dako ang ilang pagtuo nga taga Bogo ra usab ang tulisan ug ila na kining gipanid-an ang maong grupo.