Kadtong mga rehistradong botante nga molupyo dinhi sa dakbayan ug sakop sa organisasyon sa urban poor maoy prayoridad nga makabenipisyo niining maong mga health cards.
Gibutyag ni mayor Tomas Osmeña nga kining maong programa sumpay kini sa naputol nga Tommy and Tony (TNT) health cards nga gihulagway sa mayor nga wala magmalampuson.
Ang gahin alang niining maong bag-ong programa nagikan ni Presidente Gloria Arroyo ug sa Countrywide Development Fund sa iyang igsuon nga si Senador Sergio Osmeña.
Gipasabot sa mayor kun nganong halos mga molupyo sa habagatang bahin sa dakbayan ang makabenipisyo niining maong programa tungod kay epektibo man usab nga napahimuslan sa mga molupyo sa amihanang bahin ang Health cards ni kongresista Raul Del Mar.
Gawas niini sagad mga molupyo sa amihanang bahin sa dakbayan ang makabenipisyo sa 93-1 ordinance sa kapitolyo nga gipaningkamotan karon sa mayor nga matigayon pinaagi sa pagpadayon sa naputol nga landswapping sa luna sa kapitolyo og dakbayan aron hingpit nang ma-angkon ang luna nga gipuy-an sa kapin singko mil ka urban poor nga nagpuyo karon sa luna sa probinsya sa Sugbu.
Gi-angkon ni Osmeña nga wala siya maulaw nga moangkon kun ugaling masuspetsahan nga namolitika siya niining iyahang gibuhat gumikan kay sukad siya midaug og balik pagka mayor makonsiderar na nga namolitika siya sa matag higayon nga mohatag siya og mga proyekto sa kabarangayan.