Ang maong duha ka karton naggikan gihapon sa tawong giingong mipadala sa laing duha ka karton nga gituuhang peke nga tambal nga nasakmit gihapon sa CIDG7 niadtong milabay'ng adlaw sa susamang bodega.
Ang CIDG7 armado og search warrant nga giluwatan ni RTC Judge Branch 9, Judge Geralding Faith Econg aron ablihan ang maong mga kahon gumikan kay wala pa gihapoy mi-claim niini.
Matud pang Chief Inspector Jacob Macabali sa CIDG7 daan ng makapaduda ang maong mga kargamento tungod kay gikan gihapon kini sa ginganlan og Joey Fernandez nga taga dalan Aragon sa Sta.Cruz sa Manila.
Ang consignee mao ang usa ka Rita Apostol nga taga Ormoc City, apan ang contact number niini nga gibutang diha sa gawas sa karton pareho sa contact number nga gibutang usab sa unang duha ka mga kartong tambal nga nasakmit sa CIDG nga mikantidad og P300 mil nga gidudahang peke.
"Although lain-lain ang pangalan sa consignees, pero iisa lang ang contact numbers maybe iisa lang talaga itong may-ari," asoy pang Macabali.
Samtang laing usa ka kahon nga gidudahan usab mao ang karton nga ipadalahay sa Surigao apan sa pag-abli mga sinina, sapatos, mga linata, kape, asukal ug walay medisinang nakit-an diha sa maong bagahe.
Ang nangangkong mga representante nga una untang mi-claim diha sa maong bodega niadtong Miyerkules sa gabii nga giilang sila si Margarreta Fua ug Edsil Cortez kinsa gipangitaan og mga dokumentos sa maong mga tambal wala pa gihapon mobalik hangtud ning pagsulat ning balita.
Matud pang Macabali ipasusi usab kini sa BFAD kung mga peke ang ulahing duha ka karton nga gisakmit samtang kadtong unang nasakmit niadtong Miyerkules sa gabii nakapaduda pag-ayo ang packaging niini.
Sumala pa sa opisyal nga sagad ning maong mga peke nga tambal adto dad-on sa mga hilit nga mga kalungsuran diin kini ibaligya sa mga gagmay'ng botika ug diin usab wala kaayo masuhito ang mga tawo.