Koreyano nakuhaag shabu

Usa ka Koreyano ang gidakop sa kapolisan human maaktuhing mipalit og shabu sa usa ka gidudahang drug pusher diha sa dalan New Imus sa T.Padilla ning dakbayan niadtong milabay'ng adlaw.

Ang gidakop giilang si Bum Rae Cho,35, minyo ug residente sa Solid Town Homes sa Basak dakbayan sa Lapulapu kinsa nakuhaan og usa ka paketeng shabu ug gamit sa pagsuyop niini.

Ang grupo nila ni SPO1 Felomino Mendaros, PO2 Edward Abatayo, PO2 Joel Cunan, PO2 Jonas Tahanlangit, PO2 Antonio Jay Pizzaras ug PO1 Aldwin Pepito sa Criminal Investigation and Intelligence Branch nakadawat og impormasyon gikan sa ilang Barangay Intelligence Network kabahin sa transaksyon sa drogas nga nahitabo sa maong dapit

Ang grupo sa CIIB daling misusi sa dapit ug diha nila makit-i si Cho sulod sa iyang sakyanang KIA Carnival nga gitunulan sa suspetsadong drug pusher nga si Miguel Flores og shabu.

Diha-diha gisikop dayon ang duha apan gikatahong mikisi-kisi si Cho ug gitukmod niini si PO2 Pizzara hinungdan nga nagubot og makadiyot ug nakaipsot si Flores.

Gawas sa usa ka paketeng shabu nakit-an usab sa butanganan og antyuhos ni Cho ang mga gamit sa pagsuyop og shabu. Ang suspek gipasakaan na og kaso lakip na ang nakaeskapong si Flores.