20 ka raliyista nabun-og

Gibana-banang 20 ka mga raliyista ang nangabun-og ug napangos human miulbo ang binukbukay tali kanila ug sa mga sakop sa anti-riot police kagahapon diha sa atubangang bahin sa Malacañang sa Sugbo atol sa pormal na nga pagtapos sa panagtigum sa mga lider sa Asean summit diha sa CICC.

Ang grupo sa Voyagers for Peace pinanguluhan sa nagkalain-laing mga lider sa mga militanteng Bayan, Bayan Muna, Bayan Central Visayas, Bagong Alyansang Makabayan ug uban pa misuway unta og sungasong ngadto sa palasyo apan naabtan sila sa mga polis.

Kini dihang nagtapok na ang mga militante sa may dalan Osmeña Blvd. duol sa Basilica del Sto. Niño, giabog sila sa mga polis hinungdan nga nagkatag-katag ang pundok ug gibana-banang 30 kanila ang didto nakalusot padulong sa Malacañang sa Sugbo.

Matud pa sa Task Force Commander sa Crowd Dispersal Management nga si Sr.Supt. Mariano Natuel sa Banat News naulahi og dyutay sa pagbutang og igong pwersa sa may dalan M.C.Briones maong nakalusot ang pipila sa mga militante.

Giabog na ang mga militante dihang nahitabo ang binukbokay sa duha ka habig hinungdan sa mga pangos ug bun-og sa pipila ka mga raliyista ug polis.

Niadtong tungora dunay gibana-banang 200 ka mga militante ang milusad og rally samtang giatbangan sila og 400 ka mga CDM nga gilangkuban og pito ka platoon gikan sa tulo ka rehiyon.

Samtang diriyot na sad magsangka ang mga raliyista og pundok sa mga intelligence units sa Criminal Investigation and Detection Group 7 pinanguluhan ni Chief Inspector Cresaleo Tolentino human masuko ang mga militante sa pagkuha og video footages ug litrato sa mga polis kanila.

Si Tolentino sa pakighinabi sa Banat News mitug-an nga wala silay gisupak nga balaod ug natural lang sa ilang trabaho ang paghimo og dokumento sa kalihukan sa mga raliyista.

Si Renato Reyes, tigpamaba sa Bayan mihulagway nga bayolente kaayo ang gibuhat sa mga polis ngadto kanila, samtang giangkon ni Reyes nga ila gyung gisuwayan si Mayor Tomas Osmeña kabahin sa pasalig niini nga tibuok dakbayan maoy freedom park sa mga militante atol sa summit.

Apan si Osmeña kagahapon subling mipatunga og mipakgang sa tensyon tungod kay ang Malacañang sa Sugbo usa sa mga dili mahimong adtuan sa mga militante.

Duna pay usa ka sakop sa lokal nga sibyaanan ang gitutukan og maayo sa mga militante tungod sa pagdudang nagpakaaron-ingnon lang kining sakop sa media.