Sila si Barzan Ibrahim al-Tikriti ug Awad Ahmed al-Bandar gipatay kagahapon tungod sa partisipasyon sa mga krimen nga gimando ni Saddam nga diin 182 ka mga Shiites Muslim sa Iraq ang gidakop, gi-torture ug una pa gipatay niadtong tuig 1982.
Ang maong mga biktima gipasanginlan ni Saddam nga may kalambigitan sa planong pagpapatay kaniya.
Sumala pa sa report gikan sa wires, mismong ang top aide ni Primero Ministro Nuri al-Maliki nga si Basam Ridha maoy opisyal nga mipahibalo sa pagpatuman sa silot nga kamatayon sa duha.
Niadtong Nobiyembre 5 sa nakalabay'ng tuig gihukman ang duha nga bitayon human sa pila ka bulan nga paghusay sa ilang kaso diha sa hukmanan samtang nagpadayon ang gubat aron mabalik ang kalinaw sa maong nasud.
Si Barzan, half-brother ni Saddam ug maoy kanhi intelligence chief sa pwersa ni Saddam kaniadto samtang si Bandar maoy kanhi pangulo sa revolutionary court panahon sa diktadorya ni Saddam.
Gipasalig sa mga komitibang mihimo sa pagbitay nga girespeto nila ang katungod sa usa ka tawo kini bisan sila nahukman nga bitayon apan niadtong si Barzan na ang gibitay gikatahong naputol ang liog niini ug nabuwag ang ulo.
Dunay mga opisyales sa gobiyerno nga mihulagway sa insidente nga pagbuot sa Kahitas-an. Kahinumduman nga wala malipay ang daghang mga Muslim sa kalibutan human makakita sa footage sa patay'ng lawas ni Saddam human kini gibitay tungod sa paghulagway nga gitratar siyang hayop.
Gikatakdang ihatud ang mga patay'ng lawas sa duha ngadto sa ilang mga kabanay ning mosunod nga mga adlaw alang sa tukmang pagpalubong.