Polis nagbantay sa summit nahiagum og mild stroke

Usa ka polis nga sakop sa augmentation force nga gidestino isip route security sa Asean summit nahiagum og mild stroke atol sa iyang pagbantay diha sa eskina sa dalan Escario ug Osmeña Blvd. sa barangay Capitol Site niadtong Sabado sa buntag.

Ang giatake sa hypertension giilang si PO3 Roderick Villanueva kinsa gidestino sa maong dapit aron pagkontrolar sa trapiko.

Duha ka mga kaubang route security personnel nga sila si PO3 Elmer Sagal ug PO3 Rogelio Ocubillo kinsa diha usab madestino pipila ka metros gikan sa gihimutangan ni Villanueva maoy nakakita sa biktima sa pagkalup-og niini ug daling gidala sa Chong Hua Hospital.

Nasuta nga si Villanueva giatake og mild-stroke niadtong tungora hinungdan nga hangtud karon padayon pa siyang giatiman sa mga doktor diha sa maong tambalanan.

Ang mga kadagkoan sa security task force gikatahong mibisita na sa maong polis diha sa tambalanan ug mihimo na og mga lakang aron pagtabang sa galastuhan.

Gikatahong ang maong polis gikan pa sa Negros ug kabahin siya sa gipadalang pwersa sa maong rehiyon nganhi alang sa Asean summit.