Ang militanteng pundok nga gibana-banang dul-an usa ka libo nagmartsa gikan sa Fuente Osmeña Rotunda padulong unta sa ceremonial route sa may Mabolo apan gibabagan sila sa tulo ka platoon nga mga Crowd Dispersal Management.
Ang duha ka langyaw nga nasigpatang mikuyog sa panon pulos mga caucasean (puti) apan ang usa susama'g taga Middle East ang dagway nga dunay baga nga bungot.
Sila si Chief Inspector Rex Derilo sa Criminal Investigation and Detection Group-7 nga maoy gitahasang maniid sa mga langyaw'ng militante misuway unta pagduol sa maong mga langyaw aron imbitahon apan gumikan sa posibleng kasamok nga mahitabo wala na lang nila kini ihinayon.
Matud pang Derilo sa Banat News ila nang gipahibalo ang Bureau of Immigration -7 kabahin sa duha ka langyaw ug ang maong buhatan ang molihok sa pag-imbestigar niini.
Daan nang mipahibalo ang BID7 nga mahimong dakpon ang mga langyaw'ng aktibong mosalmot sa mga lihok protesta dinhi sa nasud sanglit usa kini ka paglapas sa lagda sa ilang mga visa ug kundisyon sa ilang pagbisita nganhi.
Hinuon ang maong mga langyaw wala mosaka sa entablado aron pagdiskurso susama sa nahitabo kaniadto.