Tagdumala sa bar nanghangyo sa CH

Mihangyo ngadto sa kagamhanan sa siyudad sa Sugbo ang tagdumala sa Yo Latino Bar and Restaurant nga nahimutang sa Lahug nga hatagan sila og taastaas nga lugway aron makatuman sa rekisitos sama sa pagbutang og parking area alang sa ilang mga kustomer.

Si Nixon "Jojo" Dizon tag-iya sa Yo Latino misuwat ngadto kang City Engineer Antonio Sanchez nga mipasalig nga motuman sila sa lagda sa siyudad pagbutang og parking area alang sa ilang kustomer isip maoy usa sa rekisitos aron ma-isyuhan sila og occupancy permit karong tuiga.

Tulo ka bulan ang tagal nga gipangayo ni Dizon ngadto sa siyudad aron ilang hangyuon ang tag-iya sa edipisyo nga ilang giabangan sa pagbutang og parking area human ang ilang parking area gitukoran kini sa tag-iya og laing establisamento.

Nasayran nga miluwat og closure order si Mayor Tomas Osmeña ngadto Yo Latino subay usab sa rekomendasyon sa hepe sa Office of the Building Officials (OBO) Engr. Josefa Ylanan diin gihatagan kini og pito ka adlaw nga lugway pagkoriher sa nahimo niining kalapasan aron makapadayon sa ilang operasyon.