Ang naaresto giilang si Richard Gonzalez, 52, residente sa dalan Durano sa barangay Suba sa dakbayan sa Danao pinasikad sa search warrant nga giluwatan ni RTC Branch 9 Judge, Geraldine Faith Econg tungod sa paghupot og armas.
Ang grupo ni Sr. Inspector Maribel Getigan, hepe sa IRS, mitug-an sa Banat News nga nakadawat sila og impormasyon gikan sa ilang mga police asset kabahin sa kalihukan ni Gonzales hinungdan nga ilang gilusad ang pagpangronda.
Nasakmit sa kapolisan ang unom ka kalibre .357; usa ka KG99 sub-machinegun nga may upat ka magazine, upat ka .38 kalibre nga rebolber, tulo ka .22 kalibreng rebolber (usa niini orihinal nga magnum 22); usa ka blackwidow nga kalibre 22 uban sa duha ka magazine sa kalibre 45, gatusan ka mga basiyo sa nagkalain-laing bala ug gatusan usab nga mga buhing bala.
Si Gonzalez dihang gikuhaan unta sa Banat News sa iyang habig kabahin sa pasangil midumili kini pagtubag.
Si Police Regional Office 7 Director Silverio Alarcio, Jr. mitug-an sa mga tigbalita nga posibleng gamiton ang maong mga armas karong umaabot nga eleksyon, tungod sa mga impormasyong nga ilang nadawat nga kusog kaayo karon ang halin sa maong mga armas.
"This is part of our campaign to ensure a honest,peaceful and orderly election," asoy pa sa heneral.
Sumala pang Alarcio nga duna silay nadawat nga reports nga dunay mga tawo gikan sa Zamboanga nga anha magkumprahan og armas sa dakbayan sa Danao aron dad-on ang ilang lugar.
Si Alarcio nga mitesting sa usa sa mga kalibre .357 misiaw nga "pang-isang putok lang eto" sumpay sa pag-ingon og "Eto talagang intended sa election lang eto" gumikan sa mga nakitang depektoso kaayong mekanismo niini.
Gipangusgan karon sa kapolisan ang pagmonitor sa mga armadong pundok ilabi na kadtong mga bata-bata sa mga politiko kun goons nga naglihok dinhi sa Sugbo.
"We just wanted to ensure that it should not be a bloody election, sana walang gumamit ng baril saka mga goons,"asoy pa ni Alarcio.
Midugang usab ang heneral nga ila ng gisugdan ang pagpaniid ang mga hot spots sa rehiyon ug kadtong dunay mga namonitor nga mga politikong dunay mga armadong mga sakop.
Hinuon masaligon si Alarcio nga di susama sa ubang rehiyon sa nasud kagubot ang Sugbo base usab sa kasaysayan niini sa piniliay.