Nadoble ang kaso kay kinawat nga cellphone mitingog

Nadoble hinuon ang kasong pagpangawat batok sa usa ka 31 anyos nga lalaki human ang ikaduhang cellphone nga narekober gikan kaniya mi-ring ug ang tag-iya maoy mitawag niadtong milabay'ng adlaw diha mismo sa buhatan sa Waterfront Police Station.

Ang nadakpan giilang si Edgardo Victorio Ymas, lumad nga taga Kananga, Leyte apan walay klarong address dinhi sa Sugbo.

Si Ymas walay swerteng mikuot sa cellphone sa usa ka sundalo nga si Petty Officer 3 Andrew Anthony Aguirre sa Philippine Navy kinsa iyang gikuotan sulod sa PUJ samtang nagdagan diha sa dalan M.J.Cuenco Avenue ning dakbayan.

Sa imbestigasyon sa Waterfront Police Station namatikdan ni PO3 Aguirre ang pagkuot sa suspek diha sa iyang bulsa ug gikuha ni Ymas ang 3120 nga nokia cellphone nga nagkantidad og P3,200.

Diha-diha giaresto ni Aguirre si Ymas ug gidala sa Waterfront police station.

Sila si SPO2 Conrado Rocamora,Jr., PO3 Reynold Malazarte ug ubang mga kaubanan sa miscellaneous team nga mikapkap sa lawas ni Ymas nakarekober og lain pang cellphone nga usa ka Nokia 1100 ug usa ka upos nga marijuana.

Nianang gabhiuna samtang gitanggong sa karsel si Ymas, giingong mitingog ang cellphone nga N1100 nga narekober kang Ymas ug dihang gitubag sa mga polis nagpaila ang mitawag nga si Marlyn Jimenez,19, nga taga sitio Eagle sa barangay T. Padilla ning dakbayan.

Matud pang Jimenez iya ang maong cellphone hinungdan nga giimbitar kini sa kapolisan aron pag-ila niini ug pag-ila usab sa suspek. Positibong giila ni Jimenez nga iya ang cellphone ug si Ymas mao ang tawong iyang gikasakay sa PUJ nianang alas 5 sa hapon nianang adlawa diha padulong sa dakbayan sa Mandaue.

Duha ka kasong pagpangawat ug kasong paghupot sa marijuana ang gipasaka batok kang Ymas ngadto sa piskalya.