Si Konsehal Edgardo Labella, tsirman sa committee on laws maoy nangamahan sa resolusyon nga nagtinguha pag-imbestigar sa maong reklamo tungod kay daghan sa mga pasahero sa barko ang apektado niini.
Hinuon gikonsiderar sa konsehal nga gikinahanglan usab nga dunay ibutang nga kalingawan diha sa mga barkong pasaheroan sama sa videoke aron malingaw ang mga pasahero sa ilang biyahe, apan dakong supak ang konsehal nga patuyangan lang ang kakusog niini gumikan kay makahasol usab kini ngadto sa ubang mga pasahero nga dili ganahan niini ug gustong matulog sa tungatunga sa biyahe.
Pagkakaron kasagaran sa mga barkong pasaheroan dinhi sa nasud duna gyuy mga entertainment area ug usa na niini ang pagbutang og videoke nga maoy magsilbing kalingawan sa mga pasahero ilabi na panahon sa kagabhion.
Si Konsehal Labella mibase sa Akta Republika No. 9295 nga gitawag og "Domestic Shipping Development Act of 2004" nga gitumong paghatag og kasayon nga beyahe sa mga pasahero.
Segun sa mga reklamo nga nadawat sa konsehal daghang mga pasahero nga dili makatulog panahon sa ilang biyahe sa barko tungod kay mabalda kini sa kakusog sa tingog sa videoke diha sa entertainment area sa maong barko.