Kini nahitabo pasado alas 9 kagahapon sa buntag sa National Highway, Ocaña, Carcar.
Ang naligsan ug namatay dihadiha mao si Remart Sandoval residente sa maong dapit ug tinun-an sa grade 2 sa Ocaña Elementary School.
Samtang ang nakaligis sa biktima mao ang Ceres Bus nga nagtangag sa plaka GWY 569 nga gimaneho ni Loreto Marolina, 47, minyo, nga taga Tupas ning dakbayan sa Sugbo.
Matud pa sa kapolisan, ang ulo sa biktima maayong pagkabuwag dihang nalatayan sa pangunahang ligid ug sa luyo nga bahin ang katunga sa iyang lawas nga maoy nakaingon sa hinanaling kamatayon.
Si SPO1 Joel Pananganan sa Carcar nga nahinabi sa Banat News nagkanayon nga gisugo sa inahan ang bata nga papaliton og ice sa atbang sa ilang balay maoy hinungdan nga milabang kini sa kalsada.
Matud ni Pananganan ang biktima mipalta sa klase kagahapong adlawa.
Si Boy Cañete, chief operation sa Ceres Bus nga nagbase sa habagatang bahin sa lalawigan mipatim-aw sa Carcar Police ug misulti ngadto ni SPO1 Pananganan kun duna gani maobserbaran sa mga drayber sa Ceres Bus nga kusog kaayong mopadagan kinahanglang ipalista ang body number ug ang plaka aron ilang ipatawag sa ilang opisina.
Sa pagkakaron, ang drayber gitanggong sa detention cell samtang gipaabot nga dunay panagsabot tali sa Management sa Ceres Bus ug sa ginikanan sa biktima.