Atol sa aksidente nga nahitabo pasado alas 9 sa buntag kagahapon sa atubangan sa Apo Cement Co. sa Barangay Colon, Naga, pito ka mga manindahay og utanon nga sakay sa trak de karga ang naangol.
Si Teodosio Rizon Jr., 51, taga Sitio Taptoy, Tuyan, Naga, clerk of court sa MCTC-Naga, patay na nga naabot sa South General Hospital.
Naangol silang Diosdada Bornia, 43, taga Ablayan, Dalaguete, Maria Calvo, 43, Policarpa Batoctoy, 38, Antonio Habagat, 77, Tranquilina Moran, 42, Hinshin Rosario, 66, Ace Vergel Laksi, pulos nanimuyo sa Mantalongon, Dalaguete.
Si SPO1 Bienvenido delos Santos sa Naga Police Station nga nahinabi sa Banat News nagkanayon nga ang trak de karga nga gimaneho ni Virgilio Nepumoceno, 44, taga Saksak, Dalaguete, gikan sa Mantalongon, Dalaguete nga nagkarga og mga utanon nga itumod sa Carbon Public Market.
Sumala pa nga sa paghiabot sa highway sa Colon, Naga nangatagak ang mga sinakong utanon ngadto sa karsada.
Matud sa kapolisan nga nawad-an og kontrol sa trak si Nepumoceno tungod sa kapuno niini.
Si Rizon nga nagmaneho sa iyang multicab gikan sa Tuyan paingong Poblacion, Naga gidam-agan sa trak.
Maayong pagkapasok sa multicab ni Rizon ngadto sa atubangan sa trak ug natabonan pa kini sa mga sinakong utanon nga nangahulog atol sa pagdam-ag.
Si SPO1 delos Santos nagkanayon nga dugay kaayong nakuha si Rizon tungod sa pagkapiit niini sa manobila sa multicab.
Si Nepumoceno gitanggong na karon sa kapolisan sa Naga, samtang ang ubang mga samaran gipatambalan sa South General Hospital.