Ang konseho sa maong siyudad mipasar og resolusyon sa milabay'ng adlaw aron ipatuman ang Ordinansa 2006-15 nga nagdili sa pagpamaligya og mga replika nga pusil aron paglikay sa disgrasya.
Base sa nahisgutag ordinansa nga ang replika sa mga nagkalain-laing kalibre sa pusil pweding gamiton sa mga tawo nga magbuhat og binuang.
Si Bise Mayor Aberdovey Belleza nagkanayon nga aduna na silay mga taho nga nadawat diin adunay mga dautang tawo nga migamit og mga replika nga armas sa paghimo nila og krimen.
Matud sa bise mayor nga ang tumong sa kagamhanan sa siyudad mao ang paghatag og "safety measure" sa mga lumolupyo sa dakbayan.
Base sa section 3 sa maong ordinansa nga giisip nga usa ka ilegal ang pagpamaligya sa mga tindahan ngadto sa publiko sa nahisgutang duwaan.
Gidid-an usab sa siyudad si bisan kinsa nga magduwa niini ug magdala-dala.
Ang penalty sa unang kalapasan sa ordinansa mao ang pagkonpiskar sa mga replika nga pusil ug pahimangnoan ang namaligya ug nagdala niini.
Sa ikaduhang kalapasan kompiskahon gikan sa naghupot ang gidala niining replika nga pusil ug pagpahigayon og "civic duty" sulod sa walo ka oras ang nakalapas.
Sa ikatulong kalapasan konpiskahon usab ang gihuptan niining replika nga duwaan ug pahimuon usab og "civic duty" sulod gihapon sa walo ka oras ug pamultahon og P300.
Ang mga tagdumala sa mga tindahan nga masakpang namaligya sa nahisgutang duwaan makatagamtam usab sa nahisgutang silot sa unahan gawas sa P1,000 nga ipabayad niining multa.
Apan ang mga minor de edad gihatagan og exemption sa maong mga silot.