Ang maong kamandoan naggikan kang Police Regional Office 7 director Silverio Alarcio, Jr. human sa mga balitang nanggawas kabahin sa pagbalik sa operasyon sa mga tulisan dinhi.
Sagad sa mga insidente karon sa pagpanulis diha mahitabo sa mga PUJ, kadalanan ug ang mas labing dako ning bag-uhay lang mao ang pagtulis sa Bank of Ormoc diha sa dakbayan sa Mandaue niadtong milabay'ng semana.
Si Supt. Melvin Gayotin, acting director sa Cebu City Police Office daan nang mitug-an nga wala molurang ang operasyon sa kapolisan batok sa mga kriminal bisan pa man sa pag-oktaba sa summit.
Matud pang Gayotin nga ang kanunay'ng pagpahigayon og mga checkpoints, pagpanakop sa mga gidudahang kriminal dinhi sa dakbayan maoy usa sa mga timailhang wala mopahulay ang mga polis sa ilang trabaho.
Daan nang dunay secret marshals ang CCPO apan nahunong kini pila na ka tuig ang milabay apan ning bag-uhay lang gibalik ang operasyon sa secret marshals niini dinhi sa dakbayan human sa pagpatay sa usa ka babayeng tinun-an sulod sa PUJ dihang nagmagahi kini paghatag sa iyang bag ngadto sa nag-inusarang tulisan samtang nagdagan ang PUJ diha sa Highway Tagunol sa Basak San Nicolas ning dakbayan.
Ang mga secret marshals mga sakop gihapon sa kapolisan nga di mag-uniporme apan mosakay sa mga pasaheroang sakyanan aron panid-an ang mga pasaherong posibleng dunay dautang tuyo.
Dugang sa maong kamandoan mao ang pagsumiter og inadlaw-adlaw nga report kabahin sa ilang operasyon sa tagsa-tagsa nila ka mga hurisdiksyon.