Nakaangkon og usa ka samad dinunggaban sa walang bahin sa iyang likod si Alan Toring residente sa maong lugar og dali kining gidala diha sa Balamban district hospital apan tungod sa kahimtang niini gibalhin sa Vincente Sotto Memorial Medical Center niining dakbayan.
Si PO2 Cesar Climaco polis sa Balamban nagkanayon nga naabot diha sa Vicente Sotto si Toring mga alas 2:00 sa kadlawon niadtong Huwebes apan namatay kini mga alas 8:30 sa maong adlaw.
Ang suspetsadong si Roger Narvasa nasikop diha sa ilang balay atol sa gipahigayong hot pursuit operation sa mga polis og natingkagol karon diha sa Balamban police detention cell.
Si Climaco nagkanayon nga paregla ang usa sa anggulo nga ilang nakita sa maong hitabo.
Sa wala pa mahitabo ang insidente naglakaw si Toring paingon sa ilahang balay kalit nga mitungha si Narvasa og sa walay igong rason gidunggab niini ang biktima.
Si Toring bisan og nagtinga na kini diha sa tambalanan naningkamot kining makasulti ngadto sa iyang inahan nga si Thonila kabahin sa maong insidente og gitumbok usab niini nga si Narvasa mao'y midunggab kaniya.
Apan ang maong pasangil gihimakak ni Narvasa dihang giimbistigar kini ni Climaco.