Nadakpan atol sa buy-bust operation ang suspek nga drug pusher nga si Roger Edison Aranas, 35, ug ang giingong iyang runner nga usa ka 16 anyos nga batan-on nga pulos residente sa Proper, Ermita.
Ang duha nasikop sa grupo ni Inspector Eleazar Abrigana kinsa mihimo og buy-bust operation batok kanila diha sa nahisgutang dapit ginamit ang usa ka poseur buyer.
Atol sa pagdakop nakuha gikan sa 16 anyos ang usa ka paketeng may sulod nga gidudahang shabu samtang diha na nabawi kang Aranas ang P200 nga marked money sa kapolisan.
Samtang sayo pa niana, nasikop usab ang tulo ka mga tawo sa gihimong preventive patrol sa grupo ni Abrigana diha sa sudlonong bahin sa samang barangay.
Ang nangadakpan giilang sila si Ranulfo Tejero Talisik,31, taga Duljo-Fatima, Ismael Fernandez Bato,28, ug Rolly Estorgio Meijas,30, pulos taga sitio Bato, Ermita.
Parehong nakuhaan ang tulo og mga drug paraphernalia hinungdan sa kasong ipasaka batok kanila.