Ang mga sakop sa Lupon miduso og pormal nga reklamo ngadto kang Konsehal Edgardo Labella tsirman sa committee on laws gumikan sa paglangay-langay og release sa ilang honorarium niadtong tuig 2003 ug 2004.
Si Labella mipasar og resolusyon nga nag-awhag sa Ombudsman Visayas nga dalion og sulbad ang maong reklamo sa mga sakop sa Lupon batok kang Go may labot sa kalangay pag-release sa ilang honorarium.
Apan human namantala sa Banat News ang maong proposed resolution ni Labella gi-release dayon ni Go ang honorarium sa mga sakop sa Lupon pagkasunod adlaw hinungdan nga gisibog sa konsehal ang iyang resolusyon og gi-endosar na lang ang maong reklamo ngadto sa Sanguniang Panlungsod (SP).
Kini maoy hinungdan nga gi-kalendaryo ang maong reklamo nga maapil sa agenda sa sesyon karong sunod semana.
Apil sa tukion sa konseho ang kapakyas pagpahamtang og silot ni Go nga milangay langay og release sa honorarium ug ang paggamit sa maong gahin ngadto sa laing katuyoan.
Gitinguha sa mga sakop sa Lupon nga mopasar og resolusyon ang konseho aron dili na masubli ang maong panghitabo nga paglangay langay og release sa ilang honorarium.
Gitug-an sa pipila ka mga sakop sa Lupon nga sukad sa Enero karong tuiga wala na usab sila makadawat sa ilang honorarium gumikan kay ang ilang tresurera sa barangay dili naman mo-process sa ilang payroll.
Ang sakop sa Lupon sa Pahina-San Nicolas nagdawatan lang og P1,000 nga honorarium matag bulan, P100 niini gikan sa barangay ug ang P900 gikan sa kagamhanan sa dakbayan.