Mao kini ang gibutyag ni Regional Director Carolino Mordeno sa Department of Education DepEd-7 nunot sa mga kabalakang gipakita karon sa mga tigpaniid.
Alang kang Mordeno, padayon niyang gipahinumdoman ang mga prinsipal, supervisor ug mga superintendent sa nagkalain-laing school division sa Central Visayas kalabot ning maong isyu.
Matud pa ni Mordeno nga bisan kon nahimong kinaiyang sulondon sa mga Pilipino ang pagpabuto og rebentador ug ubang matang sa pabuto panahon sa pasko ug pagsugat sa bag-ong tuig, apan gumikan sa daghan nang maot nga panghitabo gumikan sa pabuto, gipugos niya ang mga ginikanan ug estudyante sa paglikay niini.
Busa ang mga kadagkoan sa eskuylahan maoy kanunay nga mipaabot ning maong pahinumdom ngadto sa mga kabataan uban sa paghangyo ngadto sa mga ginikanan nga unta pugngan ang mga bata pagsalmot sa mga kalingawang pagpabuto panahon sa pasko ug bag-ong tuig.
Hinuon kasagaran sa mga nadisgrasya sa pabuto, mga batang wala mag-eskuyla basi sa mga obserbasyon sa mga kawani sa tambalanan.
Ang mga batang libud-suroy ug "out of school youth" maoy kasagarang masugamak sa kadaot sa lawas sama sa pagkapungkol, pagkabota, ug pagkahiagom sa mga samad ug pagkasungo sa lawas gumikan sa pabuto panahon sa paso ug bag-ong tuig.
Ang mga estudyante nakakat-on na sa paglikay ning pabuto uban sa tambag sa mga kadagkoan sa eskuylahan ug sa mga ginikanan.
Hinuon alang kang Mordeno, mas maayong dili gyud lung-an sa mga magtutudlo ang pagpahinumdom sa mga kabataan kalabot sa dakong peligro sa pabuto.