Ang Talisay City Jail dunay lima ka cottage nga puy-anan sa mga piniriso ug ang matag cottage gihatagan og usa ka sakong bugas, usa ka carton nga sardinas, noodles ug sabon nga panglaba.
Si Johnson Calub, warden sa maong prisohan, mibutyag nga matag cottage aduna kini 50-60 ka piniriso diin 35 ka priso lang unta ang ma-accommodate niini.
Lakip sa nahisgutang gidaghanon ang sobra sa 30 ka babayeng priso apan gilain kini gikan sa mga lalaki.
Sa cottage A gibutang ang mga dunay kaso sa drugas ug ang cottage B, C, D, E sagol-sagol na ang mga kaso niini.
Gibutyag ni Calub nga 70 porsyento ang gidaghanon sa mga priso nga dunay kaso sa drugas.
Bag-o lang adunay laing cottage diha sulod sa city jail ang gisugdan na sa pagpatukod sa siyudad para dili na maghuot ang mga priso.
Ang nahisgutang cottage gitagana unta kini para sa mga batan-on nga mabilanggo apan dili man kini madugay og pundo sulod sa prisohan tungod sa "Juvenile law".
Si Calub midungag nga makig-ayuda dayon sila sa Department of Social Welfare and Development (DSWD) sa siyudad kung adunay mga batan-on nga masulod diha sa city jail para dili kini madugay og tanggong sulod sa prisohan.
Ang Talisay City Jail natukod niadtong tuig 2002 u g makita nga maayo ang pagkamentenar niini sa kalimpiyo.