Giluwatan kining maong katin-awan sa mayor human gipadayag ni Alcover atol sa press conference niini kagahapon nga si Osmeña mao gyuy mabasol kun magubot ang maong summit tungod sa pagtugot niini nga makapahigayon og mga lihok-protesta ang mga militanteng pundok atol sa maong summit.
Apan alang kang Osmeña natural nga siya maoy manubag sa bisan unsang kagubot nga mahitabo gumikan kay siya man ang nagsilbing amahan dinhi sa dakbayan.
"I will accept that responsibility and I will answer for it," dugang asoy ni Osmeña.
Hinuon gipasalig sa mayor nga iya gyud nga paningkamutan nga masulbad ang bisan unsang motumaw nga problema dinhi sa dakbayan ilabi na atol sa Asean summit.
Sayo niini, gipadayag ni Osmeña nga motugot siya nga makapahigayon og protesta ang mga militanteng pundok bisan pa sa ceremonial route nga agian sa mga delegado basta wala pa kini gamita ug wala pa hingpit sirad-i.
Gani una nang gipakigtagbuan sa mayor ang mga militanteng pundok pinangulohan sa Bayan Muna, Kilusang Magbubukid ng Pilipinas (KMP) ug uban pa aron hangyuon kini nga dili magmugna og kasamok atol sa mga protesta ug rally nga ilang himuon aron dili makabalda sa mga delegado sa summit.