Ang biktima gikatahong hubog ug una kining nanghasi sa iyang amahan.
Daling gidala sa mga estambay diha sa Talisay district hospital si Richard Alfeche taga Sitio Laguna, Barangay Biasong kinsa nakaangkon og usa ka samad dinunggaban sa iyang ubol-ubol apan gideklarar sa doktor nga patay na kining naabot sa tambalanan.
Ang suspetsadong si Tomas, 65, mitahan sa iyang kaugalingon sa otoridad, giubanan ni Alfredo Lascuña barangay konsehal sa nahisgutang lugar, ug ni Dionesio Alfeche 43, paryente ni Tomas diha sa buhatan sa kapolisan Talisay.
Base sa imbestigasyon sa kapolisan, natino nga si Richard hubog kini og gipakaon ni Tomas.
Samtang nagkaon si Richard gitambagan kini ni Tomas nga atimanon ang iyang pamilya ug dili ang pagbarkada, apan nasuko ang biktima.
Mibiya si Richard gikan sa balay sa iyang amahan og mibahad nga mobalik.
Pagbalik sa biktima duna na kini dalang sundang og puno sa balas ang duha ka bulsa niini, ang maong mga balas gilabay ni Richard ngadto sa nawong ni Tomas.
Napakyas sa pag-ilog si Dionesio sa sundang nga dala ni Richard tungod kay ang biktima, giingong mas kusgan kay niya maong dali siyang misulod sa balay.
Gituslok-tuslok ni Richard sa sundang ang bintana sa balay ni Tomas tungod kay buot gyud kining mosulod apan na-locked kini dayon sa iyang pag-umangkon.
Sa kalagot ni Tomas sa gibuhat sa iyang anak mibawos usab kini sa pagtuslok og kutsilyo diha sa bintana diin ang liog sa biktima maoy naigo.
Si Tomas temporaryo karong gidetiner diha sa Talisay Police detention cell.