Ang maong kalihukan nga pulos gidumala sa buhatan ni besi Mayor Micheal Rama gilangkuban sa Pasko sa Sugbo diin buksan ug pasigaon ang labing taas nga Christmas tree nga nahimutang sa Fuente Osmeña oval diin nagpasabot kini nga mosugod na ang matag gabii nga presentasyon alang sa publiko diha sa maong lugar hangtud sa Disyembre 31.
Ang laing kalihukan nga buksan mao ang Pasko sa Carbon diin magsentro kini sa pagsaulog sa Pasko sa tanang mga manindahay sa Carbon dungan ang pagtanyag og barato nga palaliton aron madasig og balik ang publiko pagpangompra sa Carbon.
Ang ikatulong kalihukan mao ang Kasadya sa Colon nga nagpahinumdum usab sa mga Sugboanon sa labing karaan nga kalsada dinhi sa Sugbo ug nagdani sa mga Sugboanon pagbisita sa maong lugar.
Ang ika-upat nga kalihukan mao ang Pasko sa V. Rama nga gi-sentro sa kompetisyon sa pagpanindotay og dekorasyon sa Pasko sa tibuok dalan V. Rama gikan sa simbahan sa Guadalupe hangtud sa Calamba ug San Nicolas-Proper.
Sila si Mayor Tomas Osmeña ug Rama maoy opisyal nga mangulo sa pormal nga pagbukas niining maong mga nakahan-ay nga kalihukan sa Pasko.
Ang usa sa mga labing dako nga kalihukan nga mahitabo dinhi sa dakbayan karong tuiga mao ang pagpahigayon og City Tour sa mga kapikas sa mga Presidente sa lainlaing kanasuran nga delegado sa Asean summit nga ipahigayon sa Disyembre 12 diin usa kini ka tibuok adlaw nga kalihukan dinhi sa dakbayan.