Ang biktima nga 15 anyos, gitigbas sa iyang kapuyo nga si Teofisto Entina Jr. 21, ug nagtrabaho sa usa ka panaderohan didto sa maong lugar.
Matud ni PO3 Wilson Abot sa Tabuelan Police nga nahinabi sa Banat News nga ang suspek nasuko sa biktima gumikan sa gibating selos hangtod nga misangko sa mainiton nga panaglalis nga miresulta sa pagpanigbas gamit ang sundang.
Ang biktima nakaangkon og tinigbasan sa iyang ulo, ug tuong bahin sa wala nga aping ug daling gidala sa Juan Dosado District Hospital apan gibalhin sa tambalanan dinhi sa dakbayan sa Sugbo apan luwas na kini sa makuyaw nga kahimtang.
Suma pa ni PO3 Abot nga naalarma usab nila ang amahan niini niadtong milaby'ng mga buwan human manghagis kay milaban sa iyang anak human usab maglalis sa mao gihapon nga hinungdan.
Daling mihimo og paggukod ang kapolisan ug mga sakop sa Regional Mobile Group (RMG 7) batok sa suspek apan wala na kini madakpi human daling nakasibat palayo sa lugar.
Apan pagkasunod adlaw boluntaryong misurender ang suspek ni SPO1 Roy Guinita kinsa nagpuyo ra usab sa maong dapit.
Kagahapong adlawa gidala na ang suspek sa Provincial Prosecutors Office sa Provincial Capitol aron pasakaan og kasong frustrated murder ang suspetsado.