Apan ang maong mga polis kusganong mihimakak nga duna silay gihimong pagpangsiksik sa mga kabtangan sa reklamanteng si Emiliana Luayon, 42, kinsa nangangkong nawagtangan og wedding ring human sa hitabo.
Si SPO1 Filomeno Mendaros sa CIIB mitug-an sa Banat News nga tinuod nga misulod sila sa balay ni Luayon apan sila boluntaryong gipasulod niini niadtong tungora.
Matud pang Mendaros usa nila ka asset ang mitug-an nga nakapalit kini og shabu sa usa ka babayeng giilang si Ging-ging diha sa maong balay apan sa pag-adto sa CIIB wala na diha ang maong babaye nga giingong tambukon, mubo ug itomon ang pamanit.
Midugang si Mendaros nga dihang nangabli si Luayon kanila nahibaw-an dayon nilang wala kini motukma sa diskripsyong gihatag kanila ug si Luayon mismo mihimakak nga siya si Ging-ging.
"Nagduda na ming daan nga dili siya kay pagtan-aw namo dili man gyud mao ang diskripsyon, mao to nanglingkod ra mi didto unya iya ming gi-entertain," asoy pang Mendaros.
Hinungdan nga wala nila ipadayon ang pagsiksik sa balay ug ila na lang gitambagan si Luayon nga gagmay pa ang mga anak niini ug dili maayong moapil-apil sa iligal nga drogas.
Matud pa ni Mendaros nga nakasiguro sila nga diha gyud sa maong balay ang transaksyon nahitabo apan gituohan nilang nakagawas dayon ang babayeng ginganlan og Ging-ging sa dayon na nilang abot.
Nagplano karon ang CIIB nga apilon sa kiha si Luayon kun moluwat og linagdaang affidavit ang ilang asset nga diha gyud sa maong balay nahitabo ang transaksyon ug kung mahibaw-an na ang tinuoray nga ngalan ni Ging-ging