Si Supt. Melvin Gayotin, ang acting director sa Cebu City Police Office mitug-an nga matag 30 minutos pa-radyohon na sa MPG headquarters ang mga patrol cars.
Ning paagiha, matud pang Gayotin nga ma-monitor og maayo ang mga sakyanan sa kapolisan ug aron magduha-duha ang mga badlungong polis sa paggamit niini sa ilang personal nga mga lakaw.
Niadtong milabay'ng adlaw, gibalik na ni Mayor Tomas Osmeña ang gibawing napulo ka mga Toyota Innova patrol cars human sa kapin duha ka semanang pagpahipos niini sa mayor tungod sa kontrobersya ni PO2 Junicar Estiñoso ug PO1 MC Stuart Balang diha sa usa ka motel.
Matud pang Gayotin nga nakahibalo na ang mga polis kun unsang silot ang ilang madawat kun masakpang migamit na usab sa mga patrol cars sa ilang mga binuang.
Usa na ka semana ang milabay, si Konsehal Agustus Pe Jr. misugyot nga aron ma-monitor og maayo ang mga patrol cars kinahanglang iuli kini sa motorpool matag human og gamit.
Gipanawagan karon ni Gayotin ang publiko sa pagsumbong sa mga polis nga makit-ang mogamit sa mga patrol cars sa ilang personal nga mga lakaw.
Samtang aron usab nga mamenusan ang mga aksidente gimandoan ni Gayotin ang hepe sa MPG nga si Chief Inspector Arnel Banzon sa paghimo og programa nga magpokus sa pagtudlo sa mga polis nga mahimong eksperto sa pagmaneho.
Himuon na usab nga rekisitos sa madestino sa MPG nga kinahanglang eksperto silang momaneho una pa sila dawaton, samtang dili pabor si Gayotin nga mokuha og drayber nga mga sibilyan sanglit mas dako ang tulubagon kung dunay dautang mahitabo kanila.