Si Econg mibahad nga moluwat sa iyang katungdanan kung dili palagputon ni Fernandez sa serbisyo ang giingong mga kawaning midaot kaniya ngadto sa Mayor apan wala ibutyag sa legal officer ang mga pangalan sa maong mga kawani.
Matud ni Econg nga dili siya motugot nga i-amicable settlement ang maong isyu tungod sa iyang reputasyon isip city attorney.
Si Econg naghupot sa maong posisyon sukad pa sa termino ni Kongresista Eduardo Gullas isip mayor sa Talisay.
Kagahapon ang grupo sa kababayen-an ug mga opisyal sa mga barangay kinsa pulos nagsul-ob og t-shirt nga puwa mianha sa buhatan ni Econg sa city hall para mopakita sa ilang suporta sa City Attorney.
Matud ni Econg nga ang nahisgutang grupo misuporta kaniya gikatahong gidani sa usa sa mga opisyal sa siyudad nga magsul-ob og mga puting t-shirt para pagpakita og protesta batok ni Econg.
Sa laing bahin, si Fernandez nagkanayon nga ang maong problema nasulbad na dihang mipahigayon sila og close-door meeting niadtong Lunes.
Gitataw sa Mayor nga "miscommunication" ang hinungdan sa maong hitabo dihang usa sa iyang personnel nga si Jarold Borja kinsa plantilla ni Econg ang gibalhin ngadto sa General Services Office (GSO) tungod kay ang GSO nagkinahanglan og lalaki nga kawani.
Ang ngalan ni Borja nalakip sa isyu dihang usa niini ka kauban nagkanayon nga gikatahong limpiyohan ni Econg ang buhatan sa Mayor ug ilisan ang mga personnel niini sa iyang mga tawo.
Matud ni Fernandez nga si Borja nabalik na sa pagserbisyo diha sa iyang buhatan tungod kay iyang girespeto ang desisyon niini nga magpabilin sa buhatan sa Mayor tungod kay risgo ang iyang trabaho sa GSO.