Clean-up drive ug X'mas decors maoy mosugat sa Summit

Nanawagan ang mga opisyal sa siyudad sa Sugbo ngadto sa mga negosyante nga nanag-iya og establisamento ug mga pinuy-anan dinhi sa dakbayan sa Sugbo nga mo-kooperar sa halapad nga clean-up drive pagpangandam sa 12th Asean Summit karung bulan sa Disyembre.

Gibutyag ni City Information Officer ug representante ni Mayor Tomas Osmeña sa organizing committee sa Asean Summit Nagel Banacia nga gawas sa clean-up drive gidasig sab kini nga magbutang og mga christmas decoration sa atubangan nga bahin sa mga establisamento.

Kini aron nindot ug presentable nga tan-awon sa mga delegado sa maong summit ang palibot sa dakbayan.

Ang mga lugar nga sentro sa ipahigayung clean-up drive ug beautification day nga ipahigayun sa siyudad karung petsa 25 ning bulana ubos sa pagpangulo ni Bise mayor Michael Rama naglangkob sa Mabolo, Lahug, Busay, Capitol Site, Kamputhaw, Sambag-I ug II, San Antonio, Kalubihan ug Sto. Niño.

Kining maong mga nahisgutang lugar mao kiniy agi-an sa rota sa mga delegado sa Asean Summit hinungdan nga gihingusgan karun ang pagpanglimpyo ning maong mga lugar.

Matud ni Banacia kadtong mga establisamento nga daan ug karaan na gi-awhag nila kining bag-ohan og pintal aron mohaom sa mga dekorasyon nga himoon sa dakbayan pagpanindot sa lugar.